Një rënie e thellë e prodhimit industrial të Eurozonës në fund të vitit të kaluar po sinjalizon qartazi sfidat me të cilat sektori do të përballet edhe në vitin 2020. Rënia prej 2.1%, më e mprehta në gati katër vjet, ngjall dyshime nëse vërtet ekonomia do të mundet të rimëkëmbet pas gjithçkaje me të cilën është përballur. Në tremujorin e katërt ajo u rrit me vështirësi, por perspektiva e fillimit të vitit është drejtuar nga Coronavirusi, që e ka bërë gjithçka edhe më të paqartë.
Ndërsa disa rreziqe për perspektivën ekonomike u zvogëluan pasi SHBA dhe Kina ranë dakord për një marrëveshje tregtare dhe Britania u larguan nga Bashkimi Evropian, shpërthimi i virusit në Kinë e ka shtyrë botën në një krizë të re. Kompanitë kanë mbyllur fabrikat dhe kanë paralajmëruan për ndërprerje të zinxhirëve të furnizimit, një goditje e fuqishme kjo në fitimet e tyre.
Banka Qendrore Evropiane ka deklaruar se është në gatishmëri, në një kohë që kryekonomisti Philip Lane ka sugjeruar se situata mund të ketë efekte të rëndësishme afatshkurtra për ekonominë. Presidentja Christine Lagarde, nga ana tjetër është shprehur se krijuesit e politikave po shikojnë nga afër për ndonjë ndikim më të gjerë ekonomik.
Ekonomistë të tjerë deklarojnë se rënia e prodhimit industrial në dhjetor mund të vijë edhe për shkak të faktorëve të përkohshëm. Franca u godit nga grevat dhe protesta për shumë muaj me rradhë, ndërsa rënia e Gjermanisë është e lidhur pjesërisht edhe me ngadalësimin e sektorit të ndërtimit në periudhën e festave.
Tashmë investitorët shprehen se hapi i ardhshëm i autoriteteve të politikës monetare është të konsiderohen politika lehtësuese për të stimuluar ekonominë. Megjithatë edhe para shpërthimit, Eurozona pritej të rritej vetëm me një rezultat të dobët 1.1% këtë vit. Sigurisht që pas Coronavirus, rezultati do të jetë me gjasë edhe më i ulët, por kjo mbetet për t’u parë pasi Banka Qendrore Europiane do publikojë projeksionin e rishikuar në Mars./Atlas/
